Ci Maile

Monday, 19 May 2008
Gam le nam vei mahmah tei. Hih didan tuan laha theilo. Midang, gamdang leh namdang bang eng in lah, amau va suak theilo zel, hilele, a kawm ua va om in, va kigenlut, va amangthang gawpsuk. Nek-le-tak muh haksa, muhna peuh, sep muhna peuh cia, nuam in nuamkei taleh semsuk. Dam ngello, sung naumlo, lu a nat keileh gil na, gil damleh khawsik, hitang, kawng na...Hici kawmkal a kha mangthang bang vei mahmah tei zawmah, hahpan lua, gam gamla pipi khawng a va kuan, i innsung, innkiang leh khawsung lah..himahmah samlo. Hiai teng hniy-hniai kal a hun na beibei, kum na kivei-vei, mi’n khantohna leh neih-le-lam a huaipek a va-uk a hon leensan; lah eng pong mawk. Mi’ neihneih eng a mobile e, bike e, computer cihte a suak thakthak, a zatna di phatuam tak a leng zang hikhol ngello pi a deih, lah nei zo vek tuanlo maw...mauna ngen, mauna ngen.
Bang ziak a diam aw, cia ka ngaihsut ciang in a ziak hidia ka gintakte hi’ah k’on remsuk a, no bang ngaihdan na nei di u’am ah!
Gam-le-nam vai ah, ZNC leh huai ma hun genlo in, tunai diak 1990 a pat tuni dong enle, i tuploh lamlam saikhak in a om a, huai a buaiden a maban sawn theilo i bang. Oct. 01, 1998 nung a President in a gen, “lampi a tuahkhak zual” buaina a genpen tutan buaiden hile’ng kilawm kasa. Ci maile, maban saupi muhna tawh kalsuan a pai himahle hang hiai “lamkal buaina” ah sawt kidiah simta i bang kasa. Ci laile, hiai buaina in dawn suang in i thiltup “tuibang gawmna” hon dal dek khawng om a de aw? ka ci lai ve. Hiai ding ah hi, pawlpi, mimal leh innkuan in mawhpuakna i nei ciat. Think globally, act locally, a cihbang in thil lianpi tumkawm in thil neu cikcikte i cihte: kampau, gamtat hileh, pil van kul mahmah hi. I theihsiamna di’n, i pau ciang a,”Huai Vaipheipa/ Zoute/ Gangte nu” ci dan a bangmah lo dan a ina gen gaihgaih khakte khawng a zatute a dia bangmah lua, zakdahhuai petmah na hithei hi. Huai ziak i gennop pen min i theihzok kei lele den ate dan sang a kam kilawmzaw zat didan tam ahi. Ciamnuih, i cinaa, ciamnuih khui (cassette) khenkhat ah hici dan a tam mahmah a, ke’ntuh ciamnuih kasa kei, a tamzaw.
Pau leh ngeina i neiciat. I pau mi’n hon theihpih a, hon zatpih i utciat mahbang in hong kisimmawhsak ciang in iheh petmah hi. A nuamlo semlai ahihleh a pau neitute mahmah a simmawhtu a hong pan ciang un a nuam kei diak. Nekzonna, zilna leh thil tuamtuam ziak in kawlgam, vaigam ahizong gamdang mundang a i omciang in eima pau leh ngeina mangngilh mawk kei le’ng hoih hi. I pau, i la, i hamte mite’ aa sang a niamzaw leh kicinglo zaw dan a ngaihsutna pen hoihlo hi. Zomi kimlai Meitiepau hiam, Sappau a pau ding hile’ng Pasian in tua minam in hong bawl ding hi. Dr. H. Kamkhenthang cihdan in, “Van i kawmleh piakkik ding zong phawk ni”. Ahia, pau bel hun zui in ki-khengkheng a, omkawm tamin, nna semkhawm tam le’ng a hong suakkhai khat om ding hi. Nagamese bang a hia, tuan in?
Sem lo theilo, lah sep dipen theilo. Muhna peuh ci in a baihlam-lam zong. 1995-2005 lakvel in Degree neitapeuh in Private School khawng ah i sem ua, sia i ci kei. Himahleh, innkuan khawsakna dia lah tham deuhlo, lah a dang zong mannawn lo a koltang i tam uhi. Hicibang zel in sepna dang ah le. Lo nna sempeih nawnlo sim; Lamka leh khawpi deuh a nekzonna nuamdeuh lam-en in i pem ua, khawpi cihman inlah kumpi ahihke’h private ahita zong in sepdi a na omtam tuankei a, om tamawng lele siamna in daih khollo a’ihcia. Nitha lawhtawm amh a zong i suak. Sing, Siik, cement, rong cihte khoihsiam a, mitawh ki-contractdan siam i ompha hual kei uh. Mistri khat khawng jugali 3/4 in i zui ua, i lungsim uah, sepdet di lah hilo a, ni 1/2 zattawm muhna zual di’n, ci in ngaihtuah ua huai ziak in lunglut leh citak in i semkei ua, nna i siamthei kei uhi. Ci maile, hicibang khawng sem kawm-kawm napi a, nnasep van bukim a nei i tawm mahmah zawmah di uh kaci. Vaite/Meiteite khawng kha siam uncin, a engineer di mah bang vatvat mai ua, i cihman zaw hisam. Govt. sepna zongte lah, advertisement a omcia form fill-up sauhsauh, admit card muh cia GK bu khat khawng tawh tu nelhnalh, result hong suah ciang bang a se-a-serious, poi sak a sa zawmah!! Govt. aa i cih hang a siamna leh citna banah, govt. in a muantham mite cing hilel ahi, India govt. icih khawvel a govt. nasa pen pawl hizawmah a’ihkha.
Sepna muta, sempan. Ci nuamlo, sung nuamlo, kawng na...ash! gen vet dah ni. Nek-le-dawn hoihloh ziak hia, cina nuamse i bang uh. Neklam ngawhdek lelah, eite kan a, anteh-lohing freshtak a ne le om ke’nteh. Ka ci-ek giapgiap suk a, i doctorte uh leh i damdawilam siamna neite uh’n mipi theih di natna, nattheihna & kiven a tuahkhakloh di thute khawng gentawm/gelhtawm uh kasa. Mimal cih inle innten-loten i siamloh deuhmah ziak uhia? Nek-le-dawn i kidam zawhloh luat ziak uh? Talab, khaini, biri banah, i gam a piang hihetlo Bible bangzen a i ngaihthupi uh kom kuva leh a nei zawdeuhte’n zarda. Hiaite khawng ziak le hilo khollo mai di eive maw? Zu leh damdawi khamtheihte zaw gen vanglak dah ni, ka lau! Phungzathang Tonsing in, “Zogam tangvalte’n khamtheih hih a khawlai a slipper na kaih dolhdolh kal ua i nungakte’n namdangte U SINGH, U SINGH cia, namdangte zui uh ahi, a cih kha tam gen mahmah hi.
Sia V. Siampu’n a la a, Gam vangla ate laukha it a, sanggam laizomte kimuhmawh bawl, a cih bang deuh in Meitei Gam khawng “gammial” i ci ek-ek vial na ua zaw, nak vaklua. Vak phengphung mai. A lampite uh mam ngui-ngui, inn hoih taktak, nek-le-dawn kicing, gari, computer, silh-le-ten, i en mahmahte uh mi’n a kop a thuah a nei. Eilah, i lampite uh leivui/buan-nawi/suangphom; mi’n tractor a lo kai ua, buh atlai ua ei tupi/tempawng leh seng tawh lamsuk lamto a kivei lai. Hiaite khawng gammial na cihkei ua, vak phengphung dan a na muh uleh RIMS/Shija Hospitals khawng ah, Meiteite gari zang in, Meiteite heksa in Meitei doctorte kiangah sum tampi seng in va ki-ensak ve ua. Christianity khawng deih ana hile-uh ei mapek a na zom di uh, cih kei ngaihdan ahi tlat. Van-gam khawng nak noplawtel di incin, ei’ innkuan, ei’ tanaute leh lawmte deihsakhuai a, mi dang, gamdangte zaw....ciphot mai ka hi.
Ci maile, politics a i makaite khawng un inn hon lamciang un i dem ua, i gen vengvung ua, saptuam a i heutute uh, khalawh tawm cikcik la dan a kigente’ building inn mia-muate khawng, a tate uh gamdang a laisim a college mantam pipi a kuansak zote lah...Pasian vualzawlna?
Hiai teng pi khawng ka ngaihtuah ciang in hon hih su-su khat a om gige in ka thei a, k’on genkhe ek-ek tave. Hon kapkha lua bang a omleh hehpihtak in tuban ka kapkhak nawnloh di’n ana omta ua.
© zopalbawm