“AW, MAIZEN!! SULKIK HONG LEL VE”

Zan ihmu theilo a lupna tung a kingaihtuah a ka omleh kum tamsim paita a hon na genpihpih uh: ka hih didan, ka etkol didan, ithuai ahihdan leh tunung a kei hon kemtu, hon cingtu di leh kei aa dia ka tantawk hi a, kuamah dang leh thildang lunggulh san lo dia kanu leh kapa’n hon na cih ngiat-ngiat laite uh hong suakkhe dundun a. Ngaihtuah zom zel in.
“Pawt sansan ke’n. nang omloh cia thawmhau kisa ahi. It inla, kem inla, na hun uh zangkhawm tam le ucin. Nang a di petmah ahi. Ko, na nu-le-pa leh sang-gamte adi’n zaw hoihtho mahleh nag mahmah a di hiphot ahi”, ka nu’n ci zel a, ka pa bel a gentam hetkei na a, hon etdan a pan ka tung a lungkim kei cih a ciang.
Lawmte ngaih bang a na tuntun a, inn a om a cimhuai thei mahmah. A diak in “AMAH” tawh ka omciang in ka ning a kitel a, ka hehtha peuh a suak. Khut ka khakkhum ni bang a tamsek. Mi’n zaw duattak leh itsiamtak a kem dia hon deihsaktute’n genciat ua, keilah, “hon mawhsa ngen in na pang ua” ci’n ka heh semsem zel a. Sun a pawt deihkhoplo in zan sawt pipi pawtsan ka cing panta hi. Ka kizopna uh hoh tanta a bang phial mawk hi. Nidang a ittak leh duattak a zut thiamthiam a, a nitkhak di, a liam khak di lau a ka etkollai tawh kikhe mahmah ta hi.
Ka theikei. khawlak in hon hip tuntun. Midan’ tung a lungleng a, nungak leh numei a buai kahi kei. Mi’n huci di’n hon gingta mahle-uh. Kilawm hetlo, mi’ hon nuihsan zawh dikhop in biakinn kikhop leh lazil ka hon tha-it laizang hi. Khawmpi hawh nuam kasa a, thugen lasak cihte kasiam lam anihi. Genta vanglak: testimony bang a hoihthei mahmah a, tuailai pawl leh picing kikhopna a ka hih fuh theikei na a, nupi leh numei kikhopna khawng a zaw, ka vanglai a ka gen peuhpeuh nupi hon in “Amen” suupsuup mai sam eive ua. Hon theician le uh bel...
Midang leh thildang a lunglutlo, ka kisak kal in nungakte’ lak bang-ah ka hong minthang a, tangval khenkhatte sang bang in ka hong luck zaw vial hi. Inn a kinektak leh kuhkal tak a hon ngak ngiungeu; ka lungkimloh ni, ka paihak ni leh a mel-mel, a suai-suai le enlo a ka lupsan a, ka ihmutsan ciang a leng hon phunsan leh nuaksan ngeilo, AMAH in zaw, lum naikei deuhleh, hon tutpih zek laileh, ci lungsim vungvung di hive’n. Zingkal hong hi a, zan nitak kipai haklua, gimlua, kitho zolo. Tho le’ngla, a kiang khawng ah va tu in, va om maimai lengle amah na lungkim lawtel di hive’n.
Thei mah ing e.Amah’n zaw lunggulh mah. Hun pia in, a kiang ah om in, amah tawh kikhawl in a tancin khawng dong leng utlaw mah. neu cik dong lengle amah zaw paunuam a, a tancin, thil tungsa, tunglel leh hong tung ding tanpha a theih liai teng hon hilh utlua hive’n. Ka thei. Himahleh ka itkei a, ka mudah zawsop. Ka sungte bang in hon cihluih hile uh kilawm kasa. “Deihtelna neithei ka hita a,” ci’n ka pate bang ka mawhsa hi.
Amau inn a hawh ding bang, lawmte tawh pawtsawn utna ziak in ka tonpih kei sese sek hi. Khasia kisa thei mah inteh. Hon zui-ut in a phe tetet dia, kei lah amah tonpih ka utkei bilbel se sek a. Kum hong kivei a, ka nu lah a om nawnlohna sawtsim ta. Ka pa lah teeksim mahmah ta. Hon thuhilh lehleng ka thulak kei ding cih a theihluat ziak in hon thuhilh in hon tai nawn kei a, nidang a a gensekte khawng uh hon gen le-uh, a thu uh mang ut lawtel ta himahle’ng hucilam a di’n hon koih nawn kei ua, hon picing bawl lawta uh ahi ding. Ke’nlah ka naupandan, tai ka ngaihdan, thuhilh ka ngaihdan ka theikhe dedeuhta a.
Amah le zaw lungkia ahi dia, nidang a bang nawn kei. Ka itbawl a, a kiang khawng a kava om ciang inle nidang bang in ana maitai nawnkei a, a mel leng a lamdang ta. Nidang a ka bawl gentheihdante khawng ngaihdam ka ngen a, a phatuam nawn kei. Amah ka ngawhdek a, lah a mawhna phimzang muk cia leng ka mukei. Vangpha ka kisakna a beita. Nek-le-tk zon hong haksa ta a, keitung a hong kingata ahihman in, hon huhtu dipen lah hici himai ta. Nidang a lawmte, cia k ngaih mahmah a, ka va thuahthuahte lah tu’n muntuam khawng ah, a zi a tate utawh, a nnasep utawh a buai ua, panpihtu di ka tasam ta. Kisik in bangteng hihsawm le’ng le kikhel ta. Na na hihkhial hina mai ing e! Ana hai kha na’ng e!!
Ka kep utloh, ka don utloh, ka etneu, “AMAH” ka cih kua dang hilo in ka laibu, ka sinlai bute ana it in, ana zun in nana sim hile’ng zaw. Lengtong Pauno la in:
“Na khangno lai in pilna sinin hanciam in,Tualo thudang la dangte masak khake’n;Pilna siamna icih in, zon hun ding hun nei a,Sawtlo kal a hun in hong kheng pak ding hi.” acih kei a dia dik diak a bang hi. Aw, tua hun paisa maizen, sulkik hong lel ve.
© zopalbawm