MELSE NINGTUI

A mel hoih a ngaihbang hi beek lecin phave! A melsiatzaw miteng in a theihsa uh ahi. A kam lianlua kisa in a maiteng beikhin hi. A lakmai mel etding omlou ahihcian’ a nunglam en ni. A nunglam pan et in a duangciang a, pheiphung suan etlawm hi, cihna ding omlou zel hi. A tawbou bek lian lit-liat in etlahhuai hi cihna ding mawngmawng omlou in a taw zum zitzet hi. A hoihna gending tawm cihmah, LEENGLEH LANUTE leh LEENGPEELTE tawh tehkak in om tazen hi. Melhoih ningtui kidawnlou, ci buang hive un, melse ningtui bangzahta’n a limta phetdiam cih ka lunggimna khat ahi hi. A pianken mel khekthei mihing khatbek omkei mahleh a mel latdan zaw khengthei sam uhi. Nungakte’n a mel latdan uh khenna’ng in khatvei leh a sam uh sansak sensan ua, vomsak ngeingai zel uhi. A tomtan hun uh om a, a hawisau hun uh zong om hi. A kill eh thel deuhte’n nawttang uh a, a tang deuhte’n kilsak uhi. Tangvalte’n ngeina banglou a a sam uh ahawisau nepnuap ua, a tangiau vilvel zel uh zong bangdang ziak hilou in a mel latdan khen utna hang hi lel hi. Ahi, melsia, nangzaw na mellatdan khenna ding in sam na neikei a! Sambei cihmah, na mam kha ngial ve. Na hamphatna bel lu-nget vei ding lauhuailou hi. Maibei cihmah, maitai, maingal, maipha, maizap, mainuh, maigum cihte’n nang ah gen ngeilou ua; a enhuaipi hinkhua zang na bat hang in ZUMNA tawh kidim na hihman in na hin tawntung na zatdan ngaphuai sa hetkei mawk ing. A lehlam ah na kam lianpi pen bangmah genna leh sakna ding a zatlouh ding a sincip na hihman in thusia lasia genlou, kamtam, kamthei, phunhat leh hanhat cihte nei vetlou na hihman in ettontak mahmah k’onsa leuleu hi. Zumna tawh kidim hinkhua na zat hang in aw, nang Melsia, nang omna ah kamlimna om a, nang na om ciang in lungkimhuai mahmah hi. Neih leh lam kicinna leh sum-le-pai in an kamlimna leizoulou a; inn hoih, lupna hoih a leizawh hang in innsung nuam leh ihmutlimna leizoulou hi. Nangman an kamlimna leh lungnopna hon neisak cin a, nang omna a kituaktak a laikuangsawk khawm liailiai pen manpha lua hi. Mihingte’n i deihpen le hi lunggulhpen itna leh maitaina omna mun a kituaktak a omkhawm liai-liai mah hilou hiam? Kamsia leh hansia na zatlouh hang in, kamdam aw nem leh kamkhum na zatlak genkhak in omlou hi. Khatvei bek na hamging, na pauging leh na thawm zak uthuai sa mahmah ing. Lianu melhoihte sahei pakhoihtawh tehkak in om ua, Ngeisok pak tawh genkak in om uhi. Sahei leh ngeisokte etlawm mahmah ahihman un mun haksa leh gamla ah om uhi. Tuaziak in tang lelliang in a tuanna phung ah saheipak zaila in awi a, tual hong niamve ci hi. Aw nang Melsia, heisa leh sokngei bang a lunlou buang di’n na tatna leh heina kansang na lawmlawm e! Lumsuang lian bel in nangzaw sanmun na muang hial ve. Tangpa ngalliam leh nupi huaisia leh hangsante loungal batzawh louh in na om a! Kisathei ve cia. Na vangtahna khatvei sutkiklai ni aw. Tang ngalliam leh nupi huaisia leh hangsante’n salbang hon man a, hon ngah ciang un gal khawmual ah sapi kamkei leh vomphuai louhziak hiam aw, a vang uh sial in han zaila hon awihkhum ngeikei se citciat uhi. Pawipi pawinoute ah zong nang’ tellouh a hitheilou omlou mah bang in na min kilou ngeilou hi. Dongpi-dongta vai ah zong na min sialkhak in om ngeilou a, na tuuk leh sik, na man zah zong genkhak in om ngeilou hi. Ahi, Melsia aw, zaila lepsiamte’n nang ngaihna leh deihthawhna thu awi ngeilou ua, mipil misamte’n zong na pahtak-huaidan leh na manphatdan gen in neikhalou uhi. Tapsak houlimna ding a khatvei cang na hong latzual ngallou na simthu kilel mahmahlou hi. Himahleh, khase ke’n aw. Zaila awihsiamte leh thugensiamte na-ngawn bawn pahtak a, thupi bawl sang a soisak leh genphon ka siam zawngtah uh ahi. Huci’n nang bel, na tuilai in tuisih teh, na tuilouhlai in tuiteh ka hon cihciang un, phatna leh gensiatna cih hituanlou in na hihna mah genkha ka hilel uhi. Thupha thuhoih gensiam na hihding zong um tuan ke’ng. Mailam thupiang ding peuh nang hon dong in aisanna ding in hon zang peuhpeuh ua, theitakpi ding na hiam cih um mahmah kei mawk ing. Mailam thupiang ding theikhawl a, pilvang a muhkhua saupi nei hilecin na tu na tate khual mahmah in, siamna leh pilna na sinsak ding hi. Ta leh tu tampi suang na pi in na tu-le-tate adding in anlim mehlim cih gentaklouh, inn-le-lou, neih-le-lam kholkhawm a, a zon dan ding na sinsaklam kimu ngeilou a; buhsih bakkhat bek na ngaihtuahsak lam zong kigen khalou hi. Na tate mahmah tawh zong vakkhawm, takhawm liai-liai a na omlam uh kimu ngeilou hive’n innsak inn-khang kawmlou phetlou in tanau laina na theikei a, behsung-phungsung na kawmkei ngeimai! Ahia, ta-le-ta’ khankhuallou a gim-le-tawl phawklou a hinkhua zangthei nahihna ah enhuai mahmah zel hiteh! Khaile, na hoihna leh na hoihlouhna sut ding in cialna leh thuneihna cihte nei zenzenlou ka hihman in na tung ah kisuanglah mahmah ing. Bangteng ahi zong in, aw Melsia, nangzaw miten hon deihlou in, hon ngaithupi kei mahle uh ke’n zaw na mel-le-puam himhim leng etnuam leh hoih kasa a, ka hon deihthawh den ding a, ka hon ngaina den ding. Na tung a ka gitlouhna leh ka huhamdanzaw na genkei na di maw. Mi’n melhoih ningtui dawn kei mahle uh, ke’nzaw melse ningtui dawn nuam kasa. Vang mahmah in, muhhak mahle cin leng ke’n zaw ka hon zong teitei ding a, koimun hiam, koilai hiam bek a nang muhtheihna ding lampi ka zongzong ding a, “khatvei lai aw,” ka ciden ding. Aw nang Melsia, Tuivai Tengkol.